എംജി മോട്ടോർ ഇന്ത്യ ഏറ്റവും ചെറിയ വില കുറഞ്ഞ ഇലക്‌ട്രിക് കാറായ കോമറ്റ് ഇവിയുടെ ബ്ലാക്ക് സ്റ്റോം എഡിഷൻ പുറത്തിറക്കി. ഫീച്ചേഴ്സ് കൂടുതൽ വിപുലീകരിച്ചതാണ് പുതിയ പതിപ്പ്. കോമറ്റ് ഇവിയുടെ ഏറ്റവും ഉയർന്ന വേരിയന്‍റിനെ അടിസ്ഥാനമാക്കിയാണ് ബ്ലാക്ക്സ്റ്റോം എഡിഷൻ ഒരുക്കിയിരിക്കുന്നത്.
ബ്ലാക്ക്സ്റ്റോം വേരിയന്‍റ് അവതിരിപ്പിക്കുന്ന ആദ്യത്തെ ഇലക്‌ട്രിക് വാഹനമാണ് കോമറ്റ്. ബാറ്ററി സബ്സ്ക്രിപ്ഷൻ പദ്ധതിയിൽ എത്തുന്ന ബ്ലാക്ക് സ്റ്റോം ഇവിക്ക് 7.80 ലക്ഷം രൂപ (എക്സ് ഷോറൂം) വിലയും കിലോമീറ്ററിന് 2.50 രൂപ ബാറ്ററി വാടകയും വരും. ലോഞ്ചിനൊപ്പംതന്നെ കന്പനി വാഹനത്തിന്‍റെ ബുക്കിംഗും ആരംഭിച്ചിട്ടുണ്ട്. 11,000 രൂപ അ‌ടച്ച് വാഹനം ബുക്ക് ചെയ്യാനാകും.
അതേസമയം, ബാറ്ററി സബ്സ്ക്രിപ്ഷൻ ഇല്ലാതെയുള്ള കോമറ്റിന്റെ വില നിർമാതാക്കൾ പുറത്തുവിട്ടിട്ടില്ല. ബ്ലാക്ക്സ്റ്റോം എഡിഷൻ പൂർണമായും കറുത്ത പുറം കവറിലാണ് നിർമിച്ചിരിക്കുന്നത്. ബോഡിയിൽ നൽകിയിരിക്കുന്ന കറുപ്പ് നിറവും പല സ്ഥലങ്ങളിലായി നൽകിയിരിക്കുന്ന ചുവപ്പ് ഇൻസേർട്ടുകളുമാണ് റെഗുലർ പതിപ്പിൽ നിന്ന് ബ്ലാക്ക്സ്റ്റോം മോഡലിനെ വ്യത്യസ്തമാക്കുന്നത്.
