പാരിസ് ഒളിമ്പിക്സില്‍ ഇരട്ട മെഡല്‍ നേട്ടവുമായാണ് മനു ഭാക്കറിന് ഇലക്ട്രിക് മോഡലായ വിന്‍ഡ്‌സര്‍ ഇ.വി. നല്‍കി ആദരിച്ച് എം.ജി മോട്ടോഴ്സ്.
2024 ജൂലായ് 26 മുതല്‍ ഓഗസ്റ്റ് 11 വരെയായിരുന്നു പാരീസ് ഒളിമ്പിക്‌സ്. ഇതിനുപിന്നാലെ സെപ്റ്റംബറിലായിരുന്നു എം.ജി. മോട്ടോഴ്സ് വിന്‍ഡ്‌സര്‍ ഇ.വി. പുറത്തിറക്കിയത്. അവതരണ വേളയില്‍ തന്നെ ഒളിമ്പിക്‌സിലെ മെഡല്‍ ജേതാക്കള്‍ക്ക് ഈ വാഹനം സമ്മാനമായി നല്‍കുമെന്ന് എം.ജി. ഉറപ്പുനല്‍കിയിരുന്നു. ഈ ഉറപ്പാണ് ഇപ്പോള്‍ കമ്പനി പാലിച്ചിരിക്കുന്നത്. വിന്‍ഡ്‌സറിന്റെ വില്‍പ്പന 15,000 കടന്നതിന്റെ ആഘോഷങ്ങളുടെ ഭാഗമായാണ് താരത്തിന് വാഹനം കൈമാറിയിരിക്കുന്നത്. ഏതാനും ദിവസങ്ങള്‍ക്ക് മുമ്പാണ് പി.ആര്‍.ശ്രീജേഷിനും വിന്‍ഡ്‌സര്‍ ഇ.വി. നല്‍കിയത്.
ഹരിയാണയിലെ ജജ്ജാര്‍ സ്വദേശിയായ 23-കാരി മനു ഭാക്കര്‍ 2018 കോമണ്‍വെല്‍ത്ത് ഗെയിംസിലും ഷൂട്ടിങ് ലോകകപ്പിലും സ്വര്‍ണ മെഡല്‍ ജേതാവായിരുന്നു. 2018-ല്‍ നടന്ന അന്താരാഷ്ട്ര ഷൂട്ടിങ് സ്‌പോര്‍ട്ട് ഫെഡറേഷന്റെ ഷൂട്ടിങ് ലോകകപ്പില്‍ സ്വര്‍ണം നേടിയതോടെ ഏറ്റവും കുറഞ്ഞ പ്രായത്തില്‍ സുവര്‍ണനേട്ടം സ്വന്തമാക്കുന്ന താരമെന്ന നിലയിലും മനു ശ്രദ്ധിക്കപ്പെട്ടിരുന്നു. 2020-ല്‍ കായിരംഗത്തെ തിളക്കത്തിന് അര്‍ജുനഅവാര്‍ഡും ഈ താരത്തിലെ തേടിയെത്തിയിരുന്നു.
പാരീസ് ഒളിമ്പിക്‌സിലെ ഷൂട്ടിങ്ങ് മത്സരത്തില്‍ രണ്ട് വെങ്കല മെഡലുകള്‍ നേടി ചരിത്രം കുറിച്ച താരമാണ് മനു ഭാക്കര്‍. 10 മീറ്റര്‍ എയര്‍ പിസ്റ്റളിലും 10 മീറ്റര്‍ എയര്‍ പിസ്റ്റള്‍ മിക്‌സഡ് വിഭാഗത്തിലുമാണ് മെഡല്‍ നേട്ടം. സ്വതന്ത്ര ഇന്ത്യയുടെ ചരിത്രത്തില്‍ ഒരു ഒളിമ്പിക്സില്‍ ഇരട്ട മെഡല്‍ നേടുന്ന ആദ്യ താരമെന്ന റെക്കോഡും, ഒളിമ്പിക്‌സ് ഷൂട്ടിങ്ങില്‍ മെഡല്‍ നേടുന്ന ആദ്യ ഇന്ത്യന്‍ വനിതയെന്ന ഖ്യാതിയുമാണ് ഒളിമ്പിക്‌സിലെ മെഡല്‍ നേട്ടത്തിലൂടെ മനു ഭാക്കര്‍ സ്വന്തമാക്കിയിരിക്കുന്നത്.
Manu Bhaker received a Windsor EV as gift from mg
